اسلام آباد (اسٹاف رپورٹر): عالمی یوم مہاجرین کے موقع پر سسٹین ایبل سوشل ڈویلپمنٹ آرگنائزیشن (SSDO) کے ایگزیکٹو ڈائریکٹر سید کوثر عباس نے مہاجرین کے حقوق کے تحفظ، ان کی فلاح و بہبود اور عالمی یکجہتی کی اہمیت پر زور دیا۔ اپنے بیان میں انہوں نے کہا کہ دنیا بھر کے مہاجرین عالمی ترقی میں اہم کردار ادا کرتے ہیں، اور ان کے احترام، وقار، اور استحصال سے تحفظ کو یقینی بنانا تمام قوموں کی ذمہ داری ہے۔

سید کوثر عباس نے پاکستانی مہاجرین اور ملک کے اندر بے گھر افراد کو درپیش مشکلات کا ذکر کرتے ہوئے حکومت پاکستان سے اپیل کی کہ وہ مہاجرین کے بنیادی حقوق کے تحفظ کے لیے جامع اور مؤثر پالیسیاں اپنائے۔ ان پالیسیوں میں صحت، تعلیم، اور دیگر بنیادی ضروریات تک رسائی شامل ہونی چاہیے تاکہ مہاجرین کی زندگیوں کو بہتر بنایا جا سکے اور انہیں باعزت زندگی گزارنے کا موقع فراہم کیا جا سکے۔

انہوں نے کہا کہ عالمی یوم مہاجرین ہمیں یاد دلاتا ہے کہ نقل مکانی صرف بقا کا ایک ذریعہ نہیں بلکہ عالمی ترقی میں حصہ ڈالنے کا اہم راستہ بھی ہے۔ اس موقع پر ہمیں ان افراد کی قربانیوں کو سراہنا چاہیے جو بہتر مستقبل کی تلاش میں اپنے گھروں سے نکلنے پر مجبور ہوئے۔

ایس ایس ڈی او کی خدمات پر روشنی ڈالتے ہوئے، سید کوثر عباس نے کہا کہ تنظیم مہاجرین اور ان کے خاندانوں کے حقوق کے تحفظ کے لیے آگاہی پروگرامز کا انعقاد کرتی ہے اور انہیں ضروری مدد فراہم کرتی ہے۔ انہوں نے کہا کہ یہ تنظیم مہاجرین کو صحت، تعلیم، اور قانونی تحفظ کے حوالے سے ہر ممکن تعاون فراہم کرنے کے لیے پُرعزم ہے۔

ایگزیکٹو ڈائریکٹر نے مقامی اور عالمی برادری سے محفوظ، قانونی اور انسان دوست ہجرت کی پالیسیوں کے لیے تعاون کی اپیل کی۔ انہوں نے کہا کہ مہاجرین کے ساتھ انصاف اور ہمدردی کا برتاؤ دنیا کو ایک بہتر جگہ بنانے میں مددگار ثابت ہوگا۔

News Published on Alert News

News Published in Credible News Pakistan